ELISABETTA SESLER BONAU

(Sec. XIX)


AUTORITRATTO

El fisico no ze bruto né belo,
ma essendo le fogie za per cascar
no fazzo lavorar el mio penelo
e nel so cantonçin lo lasso star.

El moral – oh, po', quelo ze un modelo!
Unico che ze proprio da copiar,
gh’ò tuta Babilonia in tel çervelo
e tante lengue no se pol spiegar.

Perciò d’un “mata”, qualchedun m’onora,
ma sinonimo essendo de Poetessa
no ghe n’ho a mal, vado superba ancora.

Vivo una vita solitaria e lessa;
per mi no sponta mai una grata aurora
ma, filosofa, son sempre l’istessa.


Guido A. Quarti, "Quattro secoli di vita veneziana nella storia, nell'arte e nella poesia", 1941

ALMA SPERANTE

(1871-1946)

Nome d'arte del poeta triestino Carlo Mioni.

LEONI VENEZIANI

Leoni de San Marco

col libro del Vangelo
e el pax evangeliste,
leoni bianchi, in marmo
e in piera scalpeladi,
saldi e forti piantonadi
su le tori, su le porte,
su le ciese e sui palazi
de le cità dalmatiche,
che nele brune onde
del nostro mar, in spasimi
se specia adolorade
con calde, fisse lagrime,
spetando el grande giorno.
Leoni, sentinele
mute de fede e gloria,
trofei de nostra storia
per tanti e tanti secoli.
Leoni bei de Spalato,
de Lissa, Sebenico
Traù... Se l'odio antico,
che ancora in zerti peti
piantà ga le so tende,
ve ga zimà le ale,
ve ga mozà la testa,
leoni sempre resta
el vostro nome vivo
per infiamar le anime.
No ghe xe umana forza
che scanzelar mai possa
le vostre eterne impronte.
Se anca una matina,
xe tuto da spetarse,
sarè sparidi afato,
butadi in mar, o roti
e in polvere ridoti,
leoni de San Marco,
i dalmati, che el sangue
mai no ga vù bastardo,
che in mezo a zento ostacoli
ga combatù batalie
de un gran poema degne,
ve tien nel cor scolpidi,
nel vostro nome i spera,
nel nome vostro i speta,
che finalmente spunti
l'aurora benedeta.


Alma Sperante, Penelade, Trieste 1931

 

ADA DUSE

SFORTUNA' FIN IN FONDO

"So tanto stufo de sta vita grama
che la darìa dasseno per un scheo;
strussio, lavoro, me consumo, peno,
per aver cossa, po'... so segnà a deo

da çento creditori: el biavarol,
el paron de casa, el calegher,
che no me lassa requie fin de note
per domandarme quel che i ga d'aver.

No posso continuar in sta maniera,
no go la forza, no, d'andar a drio
a vivar sta vitazza da galera;
mi no resisto più, me buto in rio!"

El core zoso, in cale, risoluto
de metar in efeto ste intenzion,
pronto a tuto, deciso de finirla
co' na vita de stenti e privazion.

"Oh, varda, ciò, che piove; che tempazzo!
Caspita, no credevo, la vien bela!
Gnanca questa no ga d'andarme drita:
me toca tornar suso a tor l'ombrela!"


Ada Duse, "Venezia mia", 1980

L'ANO NOVO

Sono passati tre anni dall'esordio di questo blog. In principio pensavo di farlo esistere soltanto un anno (una poesia al giorno per tutto il 2010) come anticipazione dell'antologia su cui stavo lavorando, ma poi le mie ricerche sono durate per altri due anni e così, anche se di rado, successivamente mi ha fatto piacere postare e far conoscere qualche altra poesia e qualche altro poeta.

Oggi l'antologia è nelle mani dell'editore e spero che sia pronta per fine anno. Nel frattempo colgo l'occasione di farvi leggere questa mia nuova poesia.

 

 

L'ANO NOVO

 

L'ano vecio saludemo

anca sto ano xe passà,

zorni che desmenteghemo

nova speransa gavarà.

 

Se spera paxe e libertà,

lavoro, amor e schei,

salute e tranquilità

da licarse tuti i dei...

 

Se spera un fià manco tasse,

case par i venessiani,

el MOSE che funzionasse...

ai cativi, i malani!

 

Un augurio più nostrano

al governo italianìo:

"Bele robe dentro l'ano!

Ma nel senso del dadrìo..."

 

Entra, caro e novo ano,

fa come fusse casa tua...

Passa pian, sensa afano,

dane sempre tanta ua...

 

ché se bruto ti vegnarà,

refarémo un pochetin,

la vita se soportarà:

se consolaremo col vin!

     Cucina (stampa venezian del XVI secolo)
 

ALDO PURISIOL

(1934-2011)


BON NADAL!

Festoni, lampadine, tanti aredi,
tacai par le cale e in merceria,
i fa più caldi questi zorni fredi
e dal caligo spunta l'alegria.

Co' le man piene de borse e de pacheti
la zente va de pressa e, intabarada,
la zira par boteghe e fra i bancheti
fassendose i auguri par la strada.

E manca sempre qualche regaleto
che se vorìa carin e original,
o qualche cibo che no sia consueto
par far più bon el pranso del Nadal.

Zorni de festa i xe sti zorni santi,
se xe più boni e se vorìa vissin
parenti, amissi, insoma, tuti quanti,
insieme, atorno al caldo de un camin.

Fa ciaro a intermitensa l'albarelo
a la çena de vizilia, col bisato.
Se canta "Stille nacht" al Bambinelo
a mezanote in punto, col xe nato.

Se xe sgionfi, felissi e apagai,
ma come la magioransa de la zente,
se sèmo, forse, un fià desmentegai
de chi ga poco e no domanda gnente.


Toni Rioba, "Sgiansi de laguna", 1991

DUE PSEUDONIMI

 

Scriveva, un certo Capopopolo, sul "Sior Tonin Bonagrazia" del 20 giugno 1872:

 

LA DONA COSSA XELA?

 

Chi vol la dona un ente inconcepibile,

in sta vale de pianto miserabile,

dada a l'omo, compagna indivisibile,

perché'l gàbia un tormento in pianta stabile.

 

Chi dise invesse che sarìa impossibile

de star senza un ogeto cussì amabile

e che senza sto dolse, in tanto oribile,

la vita ne saràve insoportobile.

 

Diferenti de testa e d'opinion,

chi un Dio la vol, chi un spirito-foleto,

e chi el demonio dela tentazion.

 

Visto el dar e l'aver, per mi, go deciso,

che la dona per l'omo sia in efeto:

Inferno, Purgatorio e Paradiso!

 

 

Due giorni dopo, sullo stesso giornale, rispondeva Menega:

 

L'OMO COSSA XELO?

 

Un ente no xe, l'omo, inconcepibile

che in sta vale de pianto miserabile,

per disgrazia, ala dona, indivisibile,

intorno el sta, tormento in pianta stabile.

 

E se dise qualcun che xe impossibile

un omo sol trovar che no sia amabile,

mi ghe rispondo: in general, oribile,

più d'un omo conosso e insoportabile.

 

Se femene ghe xe d'altra opinion,

se le lo vol un spirito foleto,

se come Eva, tirae da tentazion,

 

sbrissar le vol, per mi go za deciso:

xe l'omo per la dona in fato e efeto

Inferno sempre sì, mai Paradiso!

SANDRO BOATO

(1938)

Sandro Boato è nato a Venezia ma si è trasferito a Trento nel 1966. Il tre agosto 2003, "La Nuova" pubblicava una sua poesia a seguito di una sua lettera che riporto, in parte, qui sotto.

 

Ho trascorso una settimana a Venezia, mia città natale, dopo molti anni di lontananza scandita da brevi visite saltuarie. Per la prima volta ho avvertito con sgomento l'estraneità da una città dove la presenza turistica è divenuta ormai marea debordante, avendo superato di molto il limite ecologico e sociale di una equilibrata convivenza tra cittadini residenti e turisti foresti. Venezia mi appare denaturalizzata, alienata dalla sua storia, sconvolta nella sua quotidianità. C'è, forse, chi può mostrare dati eloquenti a sostegno di questa impressione: il lassismo dell'amministrazione comunale verso i cambi di destinazione d'uso degli immobili e il moltiplicarsi di alberghi e pensioni equivale infatti all'accelerazione della cacciata dei residenti superstiti del centro storico...

 

 

RIVEDARTE VENESSIA

 

Ga dovesto rivar la tromba d'aria

par verzarse 'na sfesa de traverso

fra s'ciapi de turisti, come carte

da zogo, impachetàe,

roversàe dal vento e tute sparse

lassando un fià de aria, a respirar

a védar altre viste, architeture,

sentir el sigo cupo del cocàl

no sofegà da sento vosi aliene

a vardar qualche ciassa natural

pini de mar e glicine e oleandri

gondola sola

sensa copiete, sensa cansonete.

Scravassa su Venessia

aqua a seci

che lavada de tanta porcarìa

dai muci de scoasse, da plotoni

da drìo de 'na bandiera de agensia.

La sera vien co' tènare promesse,

velo de rosa fa pensar al sol

de doman, quando tornarà el bontempo

no piovarà più aqua, ma foresti

ancora, da ogni parte, a sésti, a ore:

procession sensa soste e sensa sal

da l'Asia, da l'Australia, da le Americhe.

Sta sità la sta mal

consumada e magnada come pan

e l'anema desfada.

CANZONE

La cura

Mi stavo ben solo da marso, marso de fumo e de vin
da quando i m'à messo in cura no steme venir vissin
tanto, a parlar no ghe la vanto, scolto quelo che penso mi
e se nei oci te vardo, vedo de tuto trane ti...

Ne le man na sigareta, gera come voialtri aver
el piasser de ciuciar na teta e no xe vissio, savè,
e co na ombra de rosso parlavo al dio del ciel
andar in ciesa no posso, el prete no me vol ben.

Co bevo aqua me vien da spuar,
co bevo late, da gomitar,
el tè no xe che me fa propio mal
ma za al secondo vado a cagar!

In leto andavo imbriago, sogni da gnanca no creder
desso no dormo altro, de note digo le preghiere
so stufo de la salata, brodi e minestron
sta vita xe na scoassa, me buto zo dal balcon.

Ma gera propio destin, quelo che savevo za,
Dio xe sempre co mi parché co me so butà
go trovà el megio stramasso: na bote piena de vin!
De star in cura... sto casso! Mi lo bevo pur de morir...

Co bevo aqua me vien da spuar,
co bevo late, da gomitar,
el tè no xe che me fa propio mal
ma za al secondo vado a cagar!

 

 

ZEFFIRINO AGAZZI

(?-1969)


ERGO BIBAMUS

Guai se gavessimo nome Bevilacqua,

el sarìa un disonor per la famegia
perché no posso soportar l’acqua
inveçe al vin l’ispirazion me svegia,
se po i me voda un’ombra de Lison
me sento su de carica e più bon.

Tegno per mi un secreto original

e so che’l vin svegia ogni testa dura,
se i lo savesse in giunta comunal
i tacarìa de furia a far la cura
che a forza de scudele e de biceri
i batarìa persin Dante Alighieri.

Chi beve canta, el vin xe poesia,
e in più l’è’l gran nemigo del cafè,
perché no imortalarlo in ogni via?
Contrà Verduz, Piazza del Cabernè,
Cale Merlot, Ponte Valposela,
disè, l’Italia no sarìa più bela?

Se nei congressi a le Nazioni Unite

i molasse la vena del Tocai
tante busìe no le sarìa più dite
cussì se vivarave senza guai:
un imbriago te sa dir el vero
mentre un ministro no l’è mai sincero…

Na volta el me dotor col deo per aria

ga sentenzià, lezèndome el destin
co na sicurezza straordinaria:
“Se lu se ostina a bever sto vin
xe scrito che lu mor avelenà”.
Ma lu xe morto e mi so ancora qua…

Drento el bicier xe sconto el sol, Nina,

sughelo in pressa che’l te scalda suso,
ti vedarà che l’anima te spina
i basi trategnùi co te fè el muso:
bevi gagiarda e co saremo veci,
finidi i basi, bevaremo a seci!

Zeffirino Agazzi, “El Burchielo”, Tip. Meneghini, Thiene 1970

Marco Novati (1895-1975), Bevitore

ARTURO MAIFRENI

BRICOLE IN LAGUNA

De l’aqua tuta arzento che se perde
fin dove che la pol tocar el çielo…
Le piante su la riva sfoga el verde
lassandose scorlar dal venteselo.

Su l’aqua gh’è tre pali in bel grupeto

che i se sbassa sfiorandose la testa,
e par che i se sussura un gran segreto
e quel segreto eternamente resta.

Che gran sfogo de luse e de splendori

atorno quei tre pali incatramai…
De soto i va rompendo in bei colori
speciandose ne l’aqua, roversai.

No i ze che pali! E pur vardè che sesto

vardè che grazia in quela posizion,
più che li vardo e più incantà mi resto
e più me sfanto ne l’amirazion!

Venezia mia, no ghe çità, nissuna,

che incanta come ti, o nova, o vecia…
Co tre pali piantai ne la laguna
se ga le Grazie che se parla in recia!

Antonio Pilot, “Antologia della lirica veneziana”, 1913