ZEFFIRINO AGAZZI

(?-1969)


ERGO BIBAMUS

Guai se gavessimo nome Bevilacqua,

el sarìa un disonor per la famegia
perché no posso soportar l’acqua
inveçe al vin l’ispirazion me svegia,
se po i me voda un’ombra de Lison
me sento su de carica e più bon.

Tegno per mi un secreto original

e so che’l vin svegia ogni testa dura,
se i lo savesse in giunta comunal
i tacarìa de furia a far la cura
che a forza de scudele e de biceri
i batarìa persin Dante Alighieri.

Chi beve canta, el vin xe poesia,
e in più l’è’l gran nemigo del cafè,
perché no imortalarlo in ogni via?
Contrà Verduz, Piazza del Cabernè,
Cale Merlot, Ponte Valposela,
disè, l’Italia no sarìa più bela?

Se nei congressi a le Nazioni Unite

i molasse la vena del Tocai
tante busìe no le sarìa più dite
cussì se vivarave senza guai:
un imbriago te sa dir el vero
mentre un ministro no l’è mai sincero…

Na volta el me dotor col deo per aria

ga sentenzià, lezèndome el destin
co na sicurezza straordinaria:
“Se lu se ostina a bever sto vin
xe scrito che lu mor avelenà”.
Ma lu xe morto e mi so ancora qua…

Drento el bicier xe sconto el sol, Nina,

sughelo in pressa che’l te scalda suso,
ti vedarà che l’anima te spina
i basi trategnùi co te fè el muso:
bevi gagiarda e co saremo veci,
finidi i basi, bevaremo a seci!

Zeffirino Agazzi, “El Burchielo”, Tip. Meneghini, Thiene 1970

Marco Novati (1895-1975), Bevitore

ARTURO MAIFRENI

BRICOLE IN LAGUNA

De l’aqua tuta arzento che se perde
fin dove che la pol tocar el çielo…
Le piante su la riva sfoga el verde
lassandose scorlar dal venteselo.

Su l’aqua gh’è tre pali in bel grupeto

che i se sbassa sfiorandose la testa,
e par che i se sussura un gran segreto
e quel segreto eternamente resta.

Che gran sfogo de luse e de splendori

atorno quei tre pali incatramai…
De soto i va rompendo in bei colori
speciandose ne l’aqua, roversai.

No i ze che pali! E pur vardè che sesto

vardè che grazia in quela posizion,
più che li vardo e più incantà mi resto
e più me sfanto ne l’amirazion!

Venezia mia, no ghe çità, nissuna,

che incanta come ti, o nova, o vecia…
Co tre pali piantai ne la laguna
se ga le Grazie che se parla in recia!

Antonio Pilot, “Antologia della lirica veneziana”, 1913