ALDO PURISIOL

(1934-2011)


BON NADAL!

Festoni, lampadine, tanti aredi,
tacai par le cale e in merceria,
i fa più caldi questi zorni fredi
e dal caligo spunta l'alegria.

Co' le man piene de borse e de pacheti
la zente va de pressa e, intabarada,
la zira par boteghe e fra i bancheti
fassendose i auguri par la strada.

E manca sempre qualche regaleto
che se vorìa carin e original,
o qualche cibo che no sia consueto
par far più bon el pranso del Nadal.

Zorni de festa i xe sti zorni santi,
se xe più boni e se vorìa vissin
parenti, amissi, insoma, tuti quanti,
insieme, atorno al caldo de un camin.

Fa ciaro a intermitensa l'albarelo
a la çena de vizilia, col bisato.
Se canta "Stille nacht" al Bambinelo
a mezanote in punto, col xe nato.

Se xe sgionfi, felissi e apagai,
ma come la magioransa de la zente,
se sèmo, forse, un fià desmentegai
de chi ga poco e no domanda gnente.


Toni Rioba, "Sgiansi de laguna", 1991

DUE PSEUDONIMI

 

Scriveva, un certo Capopopolo, sul "Sior Tonin Bonagrazia" del 20 giugno 1872:

 

LA DONA COSSA XELA?

 

Chi vol la dona un ente inconcepibile,

in sta vale de pianto miserabile,

dada a l'omo, compagna indivisibile,

perché'l gàbia un tormento in pianta stabile.

 

Chi dise invesse che sarìa impossibile

de star senza un ogeto cussì amabile

e che senza sto dolse, in tanto oribile,

la vita ne saràve insoportobile.

 

Diferenti de testa e d'opinion,

chi un Dio la vol, chi un spirito-foleto,

e chi el demonio dela tentazion.

 

Visto el dar e l'aver, per mi, go deciso,

che la dona per l'omo sia in efeto:

Inferno, Purgatorio e Paradiso!

 

 

Due giorni dopo, sullo stesso giornale, rispondeva Menega:

 

L'OMO COSSA XELO?

 

Un ente no xe, l'omo, inconcepibile

che in sta vale de pianto miserabile,

per disgrazia, ala dona, indivisibile,

intorno el sta, tormento in pianta stabile.

 

E se dise qualcun che xe impossibile

un omo sol trovar che no sia amabile,

mi ghe rispondo: in general, oribile,

più d'un omo conosso e insoportabile.

 

Se femene ghe xe d'altra opinion,

se le lo vol un spirito foleto,

se come Eva, tirae da tentazion,

 

sbrissar le vol, per mi go za deciso:

xe l'omo per la dona in fato e efeto

Inferno sempre sì, mai Paradiso!