CARLO RUMOR

BRUTA MA FURBA

So picola e bruta,
le gambe go storte,
so seca incandìa,
che paro la morte;

la çiera xe verde,
i oci da gato,
la goba davanti
mia mare m’ha fato;

go i brazzi che ariva
perfin ai zenoci,
go pochi cavei
co tanti peoci;

so tuta coverta
de bruschi e de rogna,
go ‘l naso che manda
l’odor de una fogna…

e pur ghe xe un toso
de mi inamorà,
e, çerto, tra poco,
el me sposarà.

Saveu mo el motivo
de tuto sto amor?
Perché go mio barba
ch’el crede signor.

Ma po, co sto toso
m’ha belo e sposà,
mio barba ritorna
un gran desparà:

cussì me so messa
co tuti d’acordo,
perché resta in trapola
el povaro tordo.


Carlo Rumor, “Chi le conta xe qua”, 1904