LE DO GONDOLE
La vecia gondola straca, sfinìa,
vissin la giovane bela, in galìa…
col fero ruzene, la prova bassa,
co i bordi a sbrindoli co’ fa na strazza…
sbatùa da l’onda: che gran dolor,
che smissiamento ghe dava al cuor!
Più in là, la zovane d’arzento el fero,
i otoni luçidi come oro vero,
i bei cordoni dei sofadini,
de piuma, morbidi i bei cussini,
la se ninava cussì, graziosa:
Co un bel rebègolo da maliziosa
la civetona! Come in boresso.
La prua sbassando co rufianesco
su e zo ne l’onda… che, co la bava
mi ghe scometo, se la… bazava!
Cussì la vita: carghe de ani
le vecie misere pianze malani…
Mentre le pute nel più dei casi,
co’ fa sta gondola:
le sogna… basi!
Ferruccio Luigi Cibin, "Tempo perso"
.jpg)
