ATTILIO CARMINATI

(1922-2013)


STRASSE, FERO, ROBA VECIA
“Strasse, fero”, el dizeva, “roba vecia
da vendar, done!…” co voze strossada,
che l’intronava tuta la contrada.
El se toleva fin l’ultima tecia,

che la fusse sbuzada opur macada.
El gera nel pagar duro de recia.
Da l’osto el se scolava po’ na secia
de quelo forte, co qualche sorsada.

Col saco sgionfo in spala el se partiva
cantussando e dizendo parolasse.
Nissun saveva da dove el vegniva,

nissun saveva dove che l’andasse.
Dopo un secolo lu ricompariva
per sigar: “Done, roba vecia e strasse!…”


Attilio Carminati, “Ai amissi”, Centro Internazionale della Grafica, 2000