ANTONIO NEGRI (Rataplan)

EL BOCOLO

Corpo de baco! El bocolo
me go desmentegà.
Ah, Nina mia, perdonime:
so tanto savarià!

Geri ti geri in colera,
tesoro mio, co mi,
el dolçe baso solito
no ti à volesto, ti!

Sul to bel peto, cocola,
se ‘l bocolo no gh’è,
el to viseto d’anzolo
un bocoleto xe;

Un bocoleto florido,
sguardo senza languor,
che no infiapisse el zovene
fogo zentil d’amor

che splende de una porpora
zentil che xe un bisù,
e che vive e che palpita
de sana zoventù.

Vustu, Nineta, el bocolo
darmelo invesse ti?
Un baso contracambime,
anema mia… Cussì!


“Sior Tonin Bonagrazia” del 5-6 Maggio 1894