CHECHI ZORZI

(?-1982)


SAN MARCO

San Marco, festa nostra, stagion bona,
Venezia xe ormai sgagia, desmissiada,
canta gloriosa al sol la Marangona,
i Mori bate el tempo… che sonada!

Da l’aria una drogheta se sprezona
che ne imboressa co na refolada,
El xe l’odor che i bocoli ne dona
e tuta la çità xe imbocolada.

San Marco, patron belo, ben tornà,
te riverisse i boni veneziani,
queli che stima e venera el passà…

Torna co ti legende e tradission,
torna a fiorir… ma più no torna i ani
che mi sfogiava el bocolo al Liston.


“El Burchielo” n.4, Aprile 1977