ANTONIO PILOT (Antofilo)

(1880 – 1930)


COME I COLOMBI

Sora i copi stamatina
do colombi massagnai
tuti alegri, imborezzai
se becava a pian pianin

E se uno in alto via
el svolava un fià distante
st’altro alora, su l’istante,
ghe coreva da viçin.

I verziva anca le ale
dal gran godi, sti baroni
e ogni tanto dei beoni
i se dava a sazietà.

Vustu che anca nu, moreta,
a becarse un fià provemo?
Dopo tuto sentiremo
se fa ben o se fa mal.

Ma da quelo che supono
mi lo credo un gusto mato;
el to beco xe ben fato
rosso come un bel coral.

E se caso mai la mama
ne dirà cossa che femo
i colombi, ghe diremo,
sto zogheto n’à insegnà…


Antonio Pilot, “Antologia della lirica veneziana”, Giusto Fuga Editore, 1913