GIAMBATTISTA MERATI (Tati Remita)

(Sec. XVIII)


Intender l'aqua, viver a zornada,
voga destesa senza spessegar,
in tel streto del rio no se ligar,
per no far gropo dar la so' siada.

Coi omeni d'onor far camerada.
Ai tressi curte, tuti saludar.
Star su la defensiva, e no bravar
senza rason per no far mai bulada.

Tratar ben la mugier; dei fioi grandoti
no far che la dotrina sia el batèlo.
Esser secreto, e no far zo merloti.

Che no deventa el magazen tinèlo,
nè casse el gheto, nè sansughe i loti.
Questo xe 'l vero barcariol: cerchèlo!


“Sagi metrici de Tati Remita”, Andrea Rapetti, 1763.