ANTONIO NEGRI (Rataplan)

A VENEZIA

Quanto bela ti xe, Venezia mia!
Mi no posso finir mai d'amirarte
Paradiso sul mar, cuna de l'arte,
viver sempre e morir qua mi vorìa.

Co' ti xe tuta piena de alegria
ti ti me scaldi 'l cuor solo a vardarte;
Co' 'l çiel xe bruto e par che 'l vogia odiarte,
sento in tel cuor 'na gran malinconia.

Venezia cara, silenziosa e quieta,
xe la belezza tua che à sugerìo
versi al zovene cuor mio de poeta;

Venezia, logo che no ga 'l secondo,
te vogio ben come a 'na mare el fio:
Lontan da ti mi son fora del mondo.


Antonio Negri, “In gondoleta: barcarole e rime veneziane”, Stab. Tip. Carlo Aliprandi, 1896