ORLANDO ORLANDINI

INVOCAZION

Cara, graziosa, bona, brava, bela,
bocoleto de rosa, zensamin,
ragio de vivo sol, sluzente stela,
fior odoroso, pianta de zardin,

colomba, lodoleta, tortorela,
crema, butiro, late, bombonsin,
de la pase dei cuori ladronsela,
maga, strigona, zucaro, bambin,

scrigno de zogie, perla, gilgio d’oro,
anzoleto del çiel, tesoro santo,
nele pene e aflizion dolse ristoro,

de l’omo vita, contentezza e vanto,
de quanto xe creà più bel lavoro,
o che ti moli un ponto… o che te pianto.


Nando, “Salata e rucola – Poesie in dialeto venezian”, 1902