ABRAMO CALORE

MARE ZE SEMPRE MARE

Cossa che fa combàtar ste creature
la creda, Gegia, no se pol pensar!
No vedo l’ora, quando che ze sera,
d’andarme a riposar.
“Comare benedeta, ghe lo credo:
co nove atorno de ‘sti birichini,
che ga l’arzento vivo! So anca mi
cossa che ze bambini.”
No, gnanca. A dir la verità sti sete
i ga qualche momento che i sta queti;
Ma go quele canagie là, la vede,
che i ze stramaledeti.
Lori no me sta fermi, garantisso,
sinque minuti in tuta ‘na zornada!
E sì che, digo, no ghe le sparagno;
Ma lori? Gnanca i bada!
“Comare, no la diga, che go ‘l mio
che peso de cussì… no savarave!
Gersera (fresca) go dovuo serarlo
in cesso soto ciave…”
Eh ben… ma no la vede adesso quelo
che ‘l me se fica dentro in armaron?
Speta che vegno mi, fegura porca…
Ciapa sto stramuson!
E adesso ‘st’altro zoga co ‘l cortelo!
Magari te tagiassistu ‘na man
che almanco ridarìa. Ciò meti zoso,
natassasso d’un can!
Comare, garantisso che so stufa
de far sta vita co quei do massai!
La lezarà un dì l’altro el “soprimento”
che mi li go copai…
La ze ‘na vita sala, un poco massa;
E de le volte perdo infin l’amor,
che no me par che gnanca i sia mi fioi:
Ghe zuro so l’onor.
“Ciò, mama, Chechi pianze”. No m’importa,
el s’avarà tagià: go tanto caro!
Cussì l’impararà per ‘n’ altra volta,
quel toco de somaro…
Dunque la me contava de ‘sta Nene?
“Sì, che l’à avudo geri ‘na bambina.”
Ah, va benon! (La scusa, cara ela:
ghe dago un’un ociadina…)
Ciò, Chechi, dove sistu? Che vedemo…
Madona santa, el s’à tagià la boca!
Agiuto, Gegia agiuto! Ma la varda?
Ma tute le me toca!
E ghe l’aveva dito “meti zoso”!
Corè: Gigeta, Piero, Ida, … Pasqual!
Gesùmaria, Signor, ah quanto sangue!
Oh, Dio! Me sento mal…
“(Dai, cori a tor de l’aqua per la mama
Che ghe sbiansemo el viso)”. Ah mama mia!
“Comare, andemo, via che no ze gnente!
Cossa vorla che sia…
No la spaventa, cassa, ‘sti putei!”
Ciò mama:: no go gnente, sastu, qua!
Vardime ben: ze sta co ‘sta sariesa
che me so un fià sporcà.
“Dio che smissiada! Mi no ghe so mesa!
La senta el cuor e i me sarvei, comare…
La sa cossa che ze?”. Eh, benedeta:
Mare ze sempre mare.


Abramo Calore, “Morfina sotto forma di versi veneziani”, G. Disnan e C. Barbaria (primi ‘900)