SE EL SANTO ME SCOLTASSE
A San Marco, el nostro patrono,
vogio parlarghe de la mia Venessia!
Proprio de Lù go tanto bisogno,
ch’el andasse a dirghe ai deputati,
delegati, assessori e compagnia
se dopo le parole, i vegna ai fati.
Le assemblee, inchieste, comission,
zonte, comitati, fufignessi, un comaresso.
E intanto Venessia va in distrussion.
xe l’usansa ormai dele ciacolete
‘na bubana de discorsi e paroloni
da ricordarse dele vecie comarete.
Cori, oh Santo, adesso che i schei no manca,
a dirghe che i se mova, i fassa presto,
se no i vol che issemo bandiera bianca.
Fa ch’el simbolo dela Serenissima
se alsa e sluxa in alto al sol
e sta çità sia sempre belissima.
Salva cussì le ciese e i so tesori,
dal salso, le crepe e le maree
mantegnendo intati i so capolavori.
E che i palassi rosegai
i diventa ancora ‘na volta
zogieli de arte mai comparai.
Fa che i campanili torna a sonar
co tuti i batoci che i ga
sensa aver più paura de cascar.
Lassa pur ch’el mar s-ciafiza le rive
fate nove, solide e che le onde
sbatociandose le deventa falive.
Che le cali, campi e campieli
i torna come ‘na volta a viver
nele memorie dei tempi più beli.
Fa che i canti nela note piena
i sentimo ancora per i canali
imagai, strigai, da sta dolçe sirena.
Adesso agiutime o Santo Protetor
el mio xe un ato de amor e fede:
salvime Venessia e darò el cuor!
Carlo Bonini, “A spasso con rime e versi veneziani”
.jpg)
