PRETE LOVO (Don Adolfo Arrigoni)

(1880-1953)


CANTONI DE VENEZIA

Cantoni de Venezia, poesia,
dispersa ai quatro venti,
resti preziosi, de na Signorìa,
che, no ga no, confronti.

Cesete cocolone, rovinàe,
ridote a magazèni,
e che speciè belesse de fassàe,
su l’acqua verde ciara.

Case de nostri veci, palazzoni,
dai muri che fa pansa,
e co le piere, che dai gornizòni,
bala la controdanza.

Sotoporteghi scuri, puntelài
da fughe de colone,
che ve desvegia el ciaro dei farài,
e i basi dei morosi.

Archi incastrài, fra le tavole e i sassi,
dei mureti de li orti,
porte, rosoni, sacri rovinassi,
par tuto seminài.

Cantoni de Venezia, poesia
fata de roba vecia
se’ fati posta per portarne via,
l’anema el cuor e i oci.


Prete Lovo, “La lezenda de San Marco”, 1927