GIUSEPPE LANZA INNOCENTE (Fugasseta)

(1868-1931)


EL NOVO CAMPANIEL DE SAN MARCO

Su, su, ressusita,
bel campanile,
sora sto popolo
sempre fedel.
Za diese secoli
el dose Tron
t’à fato solide
le fondazion:
dopo inalzandote,
coi copi in çima,
opur co l’anzolo
megio de prima
sora sta magica
nostra çità,
sfidando i secoli
ti gh’à regnà.
Gran testimonio
de fasti e glorie
che tute çelebra
le antiche storie!
Ma, in quel quatordese
lugio famoso,
forse in anticipo,
ti ze andà zoso.
Ti ze andà in fregole
senza tocar,
par impossibile
gnanca un altar!
E, come un spirito,
che no ze morto,
ti, da la polvere
ti ze risorto.
E in tempi liberi,
soto un Grimani,
ti torni in auge
dei veneziani…
Oh! Sì, ressusita
bel campanile
per el to popolo
sempre fedel!
E Dio e la Patria
in dolçe union
servi, o magnifico,
din don, din don…


Giuseppe Lanza Innocente (Fugasseta), “Raccolta di versi dialettali”, 1933