sabato 24 luglio 2010

ITALO MORO

(1908-1999)


REDENTOR

Ne la note famosissima,
xe un tripudio xe un contento,
par che torna la Serenissima,
se pur semo al noveçento.
Galegianti iluminae
da miera de umini,
barche e gondole stivae
coi so mati balonçini;
no ghe manca i vogadori,
i cantanti i sonadori,
che tien su la compagnia
ne la massima alegria;
quel che più fa impression
tanta zente e confusion
su le rive del canal,
no ghè al mondo festa ugual!
Ogni tanto dei bancheti
che te vende per rinfresco
granatine e coco fresco,
i gelati, i leca leca
da San Marco a la Zueca.
Undes’ore, i colpi s-cioca,
zoga i foghi sora el çielo
uno spetacolo più belo
çerto al mondo no ghe xe.
Ombre vaghe e sfumature
de colori e de piture.
Ne le barche anca i morosi
noi xe più tanto scontrosi;
i se basa e i se toca,
i profita sti furboni
fin che s-cioca i rochetoni,
per bazarse pian pianelo,
coi oci su nel çielo.
I tre colpi del final
te rimbonba pal canal.
Va le barche verso el Lido
co’ la zente indormensada
par spetar el sol che nasse
de la prossima zornada.
Torna queta la laguna
soto el ciaro de la luna
ma i foresti contadini
soli i resta, poarini,
scalsi i pie de le tosete
co’ in man le scarpe strete!


Italo Moro (Brocheta), “Poesie in dialetto”, Tip. Folin, 1989