martedì 20 luglio 2010

ANTONIO NEGRI (Rataplan)


DRIO LA TENDINA

Nina mia, credistu
che la tendina
basta per scòndarme
el to splendor?
O ti te imagini
che no indovina
che là, spiandome,
ghe xe el to cuor?

Là drio, al palido
zentil viseto,
pena 'l pol vedarme
vien el rossor,
tuto per scòndarte,
caro anzoleto,
xe sempre inutile
contro 'l mio cuor!

No xe 'l to mòvarte
drio lo tendina,
no xe el rifleterse
del to splendor
quel che scovèrzarte
te fa, mia Nina,
ma xe un gran palpito
che me dà el cuor.

La tenda scòndarte
pol, mia Nineta:
ti pol, ne l'anema
scòndar l'amor,
ma a chi xe inutile
far la furbeta
xe a 'sto mio zovene,
povaro cuor!


Antonio Negri, “In gondoleta: barcarole e rime veneziane”, Stab. Tip. Carlo Aliprandi, 1896