LUISA SCRIZZI GUERRINI

IN BOTEGA DE SPECIALITÀ VENESIANE

De tegnirse più podeva…
El gaveva mal de pansa!
La botega no gaveva
el servissio de creanza!
Tien el fià… xe anca peso…
Sente sgrissoli de fredo!
No ga po’ gnanca un mezo…
Desterà el xe, lo credo!
Pian el va verso la porta,
co’ fadiga ben la sera,
par cuciarse el se posta
sul zornal puzà in tera.
Finalmente… un bel respir…
Po’ co’ carta de regalo
e nastrin da souvenir,
fa un paco color zalo.
Al momento de chiusura
vol andar verso el “Liston”
el pacheto tien co’ cura
par butarlo in un bidon.
Ma un "alt!" desso lo bloca:
“Cossa xe che porta in man?”
Lu storzendo un fià la boca,
vol spiegar, ma massa pian!
“No’ xe merce dichiarada
çerto” dise el finansier.
“Noo! Ma xe na gran monada
che xe megio no’ veder…”
“El se spieghi, ben me diga,
po’ me verza el pacheto!”
“Caca xe” e squasi ziga,
“da butar nel cassoneto!
La finanza vede solo
tuto quanto contrabando,
ciapi qua, ghe lo molo,
se lo porti al comando!”


Luisa Scrizzi Guerrini, “Ve parlo ancora in Venesian”, Edizioni Bertato, 2003