GINO CUCCHETTI

(1881-1960)


LA NINA AL POZZO

Gò conossùo la Nina un ano fa;
gera de inverno, un fredo natarèlo,
mi drento a la melissa imbacucà
misurava le piere del campielo.

Ela stava picando el so secelo
arente al pozzo, e mi me son fermà;
gò dà un’ociada a quel viseto belo,
co’ la Nina discorso go tacà.

Ghe gò parlà de la passion che in cuor
me gera nata apena cognossùa,
del mio ben, del mio afeto e del mio amor;

cussì che quela sera, in te sto modo,
la Nina xe tornada a casa sua,
col cuor sgionfà… ma co ‘l secèlo vodo!


Gino Cucchetti, “Il canzoniere veneziano”, Editore G. Moncher, 1908