LUCIO MARCO ZORZI

NA STORIA ROMANTICA

Anca la rosa
se difende co le spine
come fè vù amor co mi
quando me lontanè…
Ma alfin de la storia
la rosa piase più de prima
…e a costo de ponzerse
se va a man nue
un bòcolo scavezzàr
per darlo a vù
come picola prova d’amor
in omagio a la vostra belezza
…E lo so che davanti a mi
via lo butarè…
e quando anca mi
sarò andà via
lo tirarè su per tegnirlo
un poco sul cuor…
e no pensarè più a nessun dolor
tanto sarè ben sicura
che le spine de quel fior
le gabia portae via tute mi!


“Poeti a le Colonete”, 1995