ROMANO PASCUTTO

(1909-1982)


PISSADA IN LAGUNA

L’è un putelo foresto e l’ha
voia de pissar come me nevodo.
El varda in giro se l’è vodo,
l’intrinca le gambete e, verta
la bigheta, fa arco contro sol
de oro che se sparpagna a moio.
No vergognarte, fiol. Pissa, pissa
sora sto mondo vecio che no val
‘na s-cianta sola del to bibìn.


LA FELIÇITÀ

Çerchemo la feliçità
in zorni straordenari:
‘na pataca che no riva,
‘na femena che manca,
‘na staion che sbalia.
Cussì, da ‘na verta
a ‘st’altra, consumemo
el tempo a morsegoni
come el pan co l’è poco.
Po’ da veci se acorzemo
che la feliçità spetada
no gera altro che viver,
cussì, ogni zorno un toco.


Romano Pascutto, “L’acqua, la piera, la tera”, Marsilio, 2000