mercoledì 28 luglio 2010

LUIGI GHIGI (Ciacia)

(1925-1988)


I MAGHI DEL VERO

Brombole de fogo go visto girar,
e su ponte de feri go visto supiar.
Anime danàe in ste boche de fogo,
tute suàe darente a sto rogo.
Nui come Adamo missiava a l’interno,
dentro a sta bolgia pareva l’inferno,
falive svolava come farfàle,
spandendo del ciaro tute infogàe.
Feri roventi sbateva par tera,
i pareva foleti che fava la guera.
Vesi de sangue de rosso color
e man afanose par darghe splendor.
Maghi e stregoni atorno girava,
co pinze e tenagie co arte tagiava,
l’aqua fumava dentro le pignate,
stuando i feri le bogiva da mate.
El fumo e i lampi orbava i oci,
da ste boche impissàe vegniva feroci,
ombre de diavoli brusava le spale,
da la testa a i pie tute bagnàe.
S-ciopar de colori fassendo gran ciaro
brusava ste anime sensa riparo,
potenti calori, ombre in fermento,
vite agitàe che dava sgomento.
El Satana rabioso ogni tanto sigava
che i foleti missiasse la padela infogada.
El valzer balava le vissighe impissae,
tuto giostrava atorno a le spale.
Vita da s-ciavi sia d’istà che d’inverno:
dentro le fornase go visto l’inferno.


“El Novo Burchielo” n.9, Settembre 1992