BEPI BIANCHINI

Nel punto dove el rio se fa più streto
ghe xe, ferma a una riva, una batela
ligada a pope; e giusto in fazza a quela,
ligà anca lu da pope, un sandoleto.

Lori do no ghe vede e no ghe sente,
no i parla co nessun, no i dise gnente:

de tuto quanto intorno ghe suçede
lori gnente no sa, gnente no vede.

***

I se varda tra lori fisso: e par
che i se ciama: “Tesoro vienme arente…”
E a pian a pian, ‘giutai da la corente,
se li vede l’un l’altro aviçinar.

E, senza ben capir quelo che i fa,
l’uno verso de l’altro va… va… va…

E, co le prue se toca e xe viçin,
i se svegia e i se basa senza fin…

***

E quando po’ una barca, in tel passar,
la li slontana, dandoghe un spenton;
a pian, dopo un fiantin d’esitazion,
i se torna l’un l’altro aviçinar…

Perché l’Amor xe giusto quela cossa
che vol che star lontani no se possa:

perché l’Amor, se gh’è un impasso o un ris’cio,
xe proprio alora che el deventa vis’cio.


Bepi Bianchini, “Le vilote del rio”, Fratelli Drucker, Padova, 1908