ORLANDO ORLANDINI

PER EL BUSO DE LA CIAVE…

I oci go pusà suso indiscreti:
la scominsiava alora a despogiarse…
cole manine bianche, da baseti,
la vedeva el vestito a sbotonarse.

Le me pupile, lustre come agheti,
parea che le volesse, là, impiantarse,
più che le veste se fasseva scarse
e più me diventava i sensi inquieti

corpeto, busto, cotole, scarpete
e tuto el resto gera ormai cavà:
restava la camisa e le calzete;

e go visto una man che s’à slongà
verso do cordonsini co balete…
el lume proprio in quel s’à destuà.


Nando, “Salata e rucola – Poesie in dialeto venezian”, 1902