OLGA BORGATO

EL LEON DE SAN MARCO

Che schiza, done! Ma vardèlo in muso
e disème: no xelo da basar?
Ma qua, se riga driti come un fuso:
no ‘l xe dasseno bestia da scherzar!

Vardè che ocieti! Co ‘l so libro verto,
(e la zatina el ghe destira su!)
no se volta la pagina de çerto,
se par tegnirghe el segno el pensa lu!

Pax tibi Marce… ma se caso mai,
dise quei oci, i me tocasse qua
o un colombeto solo o i mii cavai,

eh! Come gnente, par tirarli in là!
Par el momento semo destirai,
coi oci verti e el libro sbalancà!


Olga Borgato, “El cuor”, Editore Cabianca, 1928