EPIGRAMMI
I
Nemighe dei omeni,
per genio crudeli,
superbe, infedeli,
le done se chiama,
né tase nessun;
e pur co sti radeghi
chi è quel che no ama?
Che no s’inamora?
Che drio no ghe cora?
Disèmene un.
VII
Mi son giusto de puina
che ogni poco me rovina.
Ochi, cavei, colori,
tuto me par tesori,
e unite a mile a mile
sento le tentazion.
Me incanta le bianche,
me acende le more,
son sempre l’istesso
a tute le ore;
pulite e pitoche
per mi tuto è bon.
XII
Le vol aver un muso
che se ghe mora suso,
le vol che tuto sia
belezza e legiadria.
E po… le man a casa.
E po… tegnirse in fren.
Chi pol senza esser mati
acetar mai sti pati?
Disèghelo a dei legni
che i toga de sti impegni;
opur no andè cercando
che se ve vogia ben.
Bartolommeo Gamba, “Collezione delle migliori opere scritte in dialetto veneziano. Volume undicesimo: Poesie di autori diversi”, Alvisopoli, 1817
.jpg)
