Da “I orti de Muran”, un poemetto di sessanta strofe, trascrivo le venti dedicate a Gaspara Stampa.
… A Ca’ Da Mula un arco bisantin
ancora snelo el se rebalta in alto,
pien de ricami, in marmo, a lustrofin,
come de smalto.
Soto quel arco, quando tuta in festa
se univa la più bela società,
quando el giardin pareva una foresta,
tuto infiorà,
una dona più bela de le bele,
una dona pianzeva de scondon,
co l’ocio voltà in su, verso le stele,
in convulsion.
El lavro borbotava un nome grando
che credeva l’amor fogo de pagia:
quel Collaltin che meritava el bando:
una canagia.
Oh! Quanti pianti soto l’arco snelo
che ancora vedo vivo in tanta morte,
quanti sospiri al so’ moroso belo
zovane e forte!
Gaspara Stampa, su le fogie nove
che cresse nei giardini abandonai
forsi, çercando, trovarave prove
dei to’ pecai!
Pecai, per doparar la frase in uso,
parchè a sto’ mondo no se gà mai dà
che l’amor a l’onor ghe fassa un buso,
ch’el sia pecà.
Safo moderna, disgraziada tanto
ne la passion che t’ha costà la vita,
suga quei oci che se svoda in pianto
co la man drita.
Co la man drita che xe ancora pronta
a scriver versi per l’eternità,
in dove che le pene tue se conta,
da far pietà.
Sì, sempre el nome tuo, nome de fada
el cuor ricorda co malinconia
per tuto dove che s’ha fato strada
la to’ poesia.
Ma a ti no te bastava tuto questo:
ti volevi el so amor, solo el so amor,
calcolando la gloria e tuto el resto
roba che mor.
E vardando quei perfidi giardini,
pensando al dì che ti l’ha conossuo
ti ghe parlevi, avendo el cuor sui spini,
che xe sta suo.
“Amor mio santo più del Dio che adoro,
amor mio belo che ti m’ha lassà
dame un fiantin d’amor, se no mi moro
senza trar fià.
Pensar che un’altra godarà el contorno
del to’ corpo lisiero, a piena panza,
forse arivando a farte qualche corno,
come xe usanza,
xe roba da magnarse i dei pianzendo,
xe roba da morir de gelosia,
e un çerto che me parlava e va dixendo:
la xe finia.
Se mi te vardo, sento una gran fiama
per ti, solo per ti, dentro del sen;
fame quel che ti vol; fame pur mama…
te vogio ben!
Mama d’un putelo, che gavesse
i ocioni tui, la boca tua el to viso.
Rinunçiaria per questo a le belesse
del Paradiso.
So mata no xe vero? Bastarìa
che te restasse almanco la memoria
de mi che te go scrito la poesia
che t’ha dà gloria.”
E ti xe morta, Gaspara, sperando
de averlo a ti sia pur per qualche scianta
e ti xe morta, sempre confidando
povara santa!
No ti savevi che no xe permesso
esser dona de scienza e de poesia!
L’omo magna quel fruto arosto o lesso,
po’… el passa via…
Pietro Ermanno Serena, “Fior da fiore”, A cura del circolo Vivarini di Murano, G. Zanetti
Gaspara Stampa
.jpg)
