CARLO GOLDONI

(1707-1793)

Poema composto da 59 ottave “per le felicissime nozze dell’eccellenze loro ZORZI e BARBARIGO”.


LA PICCOLA VENEZIA
(ottave 27, 28, 29)

…………………………………………………………
Vedo un omo sentà, che ha mal un pie,
ma col viso bronzin, robusto e san,
una di quele tal fisionomie
da galantomo, e vero cortesan.
Quando el me vede, el vol levarse in pie.
“No - ghe digo - stè là, son Venezian.
Cerimonie no fe, no ghe ne fazzo”.
“Patria, patria!” — El m’abrazza, e mi l’abrazzo.

Domando a chi lo sa. Cos’è sto affeto
che al nome dela patria in cuor se sente?
Xelo dela natura un puro effeto?
O pur xela un’idea che nasse in mente?
Per mi son d’opinion che l’inteleto
preferissa la patria al’altra zente
per amor proprio, per quela rason
che, quel ch’è nostro, par più belo e bon.

Che sia la verità, tuti no sento
amar la patria con egual ardor.
L’osel de trista vale è malcontento,
e la miseria supera l’amor.
Mi che son nato, per felice evento,
in un paese a tanti superior,
gh’ho rason de lodarme e gh’ho ambizion
quando trovo qualcun de sta nazion.
………………………………………………………….


Carlo Goldoni, “Componimenti minori”, Sonzogno, 1896